Eyðun Rasmussen

Tey, ið gjøgnum seinastu mongu árini hava samskift við kommununa um tryggingar, grundstykkir, skeytir o.a., hava havt nógv samskifti við Eyðun. Hann hevur verið staðsettur í kjallarahæddini á Kommunuskrivstovuni í Heiðunum saman við móttøkuni, kommunuskrivaranum og borgarstjóranum.

Eyðun var borin í heim á Skála hin 15. mars 1955. Hann er sonur Kristian og Rakul, giftur Joan, - og eiga tey tríggjar synir. Hann hevur búð á Skála alla sína tíð. Barnaskúlan gekk hann á Skála, og í 1969 lá leiðin út á Strendur í realskúla, haðan hann fekk prógv í 1972. Sum flestu skáladreingir arbeiddi hann í Turkihúsinum ella á Skipasmiðjuni, táið ein løta var, og serliga tíðarmálini tá uppiløga var í skúlanum á sumri.

Við realpróvnum í hondini fór hann at arbeiða sum húsasmiður í byggivirkinum hjá beiggjanum Pálli í eitt gott ár. Eftir tað virkaði hann sum sveisari á Skála Skipasmiðju í eitt lítið ár.

Eftir hetta intermezzo fekk hann lærupláss á deildini hjá Føroya Banka í Saltangará. Hetta var í juni 1974, og har virkaði hann fram til 1986. Hetta var tíðin tá Johan Hansen – Hanni í Bankanum – og Gorm Nielsen ráddu fyri borgum á deildini. Árini 1986-1990 arbeiddi hann sum grannskoðari hjá Grannskoðarastovuni á Skála. Hann slepti kortini ikki fíggjargeiranum. Í 1990 varð hann aftur starvssettur í Føroya Banka. Fyrstu fýra árini á høvuðsdeildini í Tórshavn og síðan fram til millenniumskiftið aftur í Saltangará.

Nú broytti hann av álvara kós. Gjørdist kommunuskrivari hjá Skála kommunu, og virkaði sum slíkur fram til ta stóru samanleggingina í 2005. Ein part av tíðini var hann eisini skrivari hjá Elduvíkar kommunu. Soleiðis gjørdist hann ein ítøkiligur partur av tilgongdini, táið fimm kommunur fyrst í hesari øldini løgdu saman av Tinghelluni norður á Førjaklettin – og úr Lamba yvir á Skála.

Nú hann gevst á professionella arbeiðsmarknaðinum, kann hann hyggja aftur á eitt virkið lív við nógvum brigdum. Táið staðbundnu nevndirnar vóru skipaðar, eftir samanleggingarnar, fekk Eyðun í uppdrag at vera skrivari hjá nevndunum, og soleiðis hevur hann hjálpt borgarstjórunum, sum altíð eru valdir oddvitar í nevndunum, at skipa fundirnar. Tað hava verið mangar góðar og gevandi løtur á Skála, í Skálafirði, Funningsfirði, Funningi, Elduvík og í Oyndarfirði.

Sum flestu aðrir føroyingar hevur hann eisini havt aðrar kasjettar á høvdinum. Tvey skeið hevur hann sitið í kirkjuráðnum á Skála, hann sat í skúlanevndini eitt skifti, í Skála sjúkrakassa sat hann eisini, eisini eitt skifti sum formaður og sum slíkur nevndarlimur í meginfelagnum hjá føroyskum sjúkrakassum. Hann var við til at skipa bátafelagið Kahyttin, staðsett við bátahylin á Skála, og hann situr framvegis í nevnd felagsins. Hann hevur í mong ár sitið í valstýrinum fyri Skála, - eisini sum formaður. Í hagapartinum Innan Gjógv er hann skrivari og kassameistari, og tey sum kenna Eyðun vita, at hann er trúgvur javnaðarmaður. Sum slíkur hevur hann í fleiri skeið sitið sum nevndarlimur í Eysturoyar Javnaðarfelag.

Fyri Runavíkar kommunu og borgarar okkara fari eg við hesum at takka Eyðuni fyri starvstíðina og ynskja honum og fjølskylduni blíðan byr í ókomnari tíð.

Tórbjørn Jacobsen, borgarstjóri