HEIM
11.10.2020

Val til Eldraráð í Roðanum

Á seinasta stýrisfundi í Roðanum varð samtykt at skipa eitt eldraráð fyri økistænastuna við Skálafjørðin – Roðan, vísandi til løgtingslóg nr. 19 frá 7. apríl 2014 um heimatænastu, eldrarøkt v.m.

Avgjørt var, at hvør kommuna sær skipar fyri valinum til Eldraráðið í samband við kommunuvalið 10. november 2020.

Endamálið hjá Eldraráðnum er at betra og útbyggja sambandið millum teir eldru borgararnar og Roðan, sum er samstarv á eldraøkinum millum kommunurnar við Skálafjørðin.

Fyri at kunna stilla upp, skal tú vera 60 ár ella eldri, sjálvan valdagin. Atkvøtt verður millum teir persónar, sum skrivliga hava boðað kommununum frá, at teir stilla upp.

Valskeiðið gongur frá 1. januar 2021 og fram til 31. desember 2024.

Kundi tú hugsað tær at stilla upp, skalt tú taka niður og fylla út hesa valevnisfráboðan.

Skjalið fæst eisini við at skriva til runavik@runavik.fo ella við at ringja til tlf. 417000.

Skjalið fæst eisini á skrivstovunum í kommununum við Skálafjørðin ella á skrivstovuni hjá Roðanum í Runavík. Saman við valevnisfráboðanini skulu undirskriftir frá minst tveimum stillarum fylgja við, sum eisini hava valrætt til Eldraráðið.

Eingin kann vera stillari fyri meira enn eitt valevni. Fráboðanin skal latast einari av skrivstovunum í kommununum.

Valevnisfráboðaninar mugu vera kommununi í hendi í seinasta lagið mánadagin 20. oktober 2020, kl. 18.00. Persónar á innkomnu valevnisfráboðanum verða førdir á eitt samla yvirlit, ið verður almannakunngjørt.

Eldraráðið verður samansett, eftir viðtøkunum í stýrinum fyri Roðan, eldrasamstarvið millum kommunarnar, eftir hesum leisti, 1 umboð fyri hvørjar 2.000 borgarar, og tí skulu veljast hesir limir:

-Sjóvar kommuna: 1 umboð og 1 varaumboð.

-Runavíkar kommuna: 3 umboð og 3 varaumboð.

-Nes kommuna: 1 umboð og 1 varaumboð.

Eldraráðið skipar seg sjálvt.

Tey næstvaldu á viðkomandi vallistum verða varalimir eftir galdandi valreglum.

(Nr. 2 verða varalimir hjá Nes og Sjóvar kommunum, meðan 4-5-6 vera varalimir hjá Runavíkar kommunu).

Valið verður hildið samsvarandi samtyktu viðtøkunum fyri Eldraráðið í Roðanum. Til ber at fáa viðtøkurnar við at venda sær til eitt nú Runavíkar kommunu.