HEIM
04.09.2018

Mín fantastiska skilsmissa í Løkshøll leygarkvøldið

Leygarkvøldið 8. september kl. 20 sýnir Tjóðpallurin leikin "Mín fantastiska skilsmissa" í Løkshøll. Atgongumerki eru til sølu á loksholl.fo. Einans 90 pláss eru til sýningina, so her má skjótt berast at.

"Mín fantastiska skilsmissa" er ein romantisk komedia við Kristinu Sundar Hansen í heimskenda og virðislønta einrøðuleikinum eftir Geraldine Aron.

Angela Kennedy Lipsky er ein kvinna miðskeiðis í lívinum, sum plagdi at vera onnur helvtin av eydnuríka parinum Angela og Max. Max stingur tó av við einum yngri modelli, dótturin flytir út við sjeikinum, og eftir situr Angela við hundinum Dexter í stóru familjuhúsunum.

Nýggi veruleikin hjá nýskildu Angelu hevur nógvar øðrvísi, tragiskar og ikki minst komiskar og láturligar støður við sær, sum áskoðararnir hegnisliga verða drignir ígjøgnum av Kristinu Sundar Hansen í leiklutinum sum Angela.

Leikurin varð tilnevndur ein OLIVIER AWARD fyri “Best entertainment” í 2004 og hevur síðan lagt áskoðarar kring heimin flatar í látri. Nú standa Føroyar fyri tørni, sum 29. landið, har leikurin verður pallsettur.

Týðing: Kristina Sundar Hansen
Konsept: Kristina Sundar Hansen & Durita Sumberg Poulsen

Dramaturgur, pallur og hjálparleikstjóri: Durita Sumberg Poulsen
Leiklistarlig ráðgeving: Ágústa Skúladóttir
Ljósdesign, video og pallmynd: Turpin Napoleon Djurhuus
Ljóðmynd: Pauli Magnussen

Leikari: Kristina Sundar Hansen