HEIM
14.02.2017

Ber orðið brek?

Kjakfundur á bókasavninum mikukvøldið 15. februar kl 19.00.

Hugsar tú nakrantíð um týdningin, ið orð hava, og um týdningin í, hvussu vit orða okkum? Orð, ið verða nýtt um okkum og um onnur, hava nevniliga beinleiðis ávirkan á, hvussu vit fata okkum sjálvi og tey, vit eru saman við.

Orð hava týdning, orku og makt og eru í veruleikanum sterkasta vápn okkara. Orð kunnu hjálpa, ugga, eggja, leiðbeina og skapa vinabond. Tey kunnu eisini oyðileggja, sára, bróta niður, eyðmýkja og skapa fíggindar. Hvønn dag velja vit hvørji orð, ið skulu mynda okkum og harvið avgera vit í stóran mun sjálvi, hvussu onnur verða lýst og sædd.

Ja, ber orðið brek, so eiga vit møguliga ikki at nýta tað. Ella hvat heldur tú? Hvussu eiga vit at orða okkum?

Kom á Bókasavnið við Løkin 15. februar kl. 19:00, tá ið hugleitt verður um orðið brek og lagt verður upp til kjak, har tú kanst vera við og hava ávirkan.

Kunnu vit møguliga finna eitt nýtt orð fyri orðið brek?

Luttakarar við pallborðið eru:

  • Jonnhild Reynholdsdóttir, forkvinna í Sosialu nevnd
  • Meinhard Jensen, studentaskúlalærari
  • Marna K. Jacobsen, Málráðið
  • Herit Joensen, lærari
  • Tormóður Stórá, leiðandi yvirlækni

Tóra við Keldu, forkvinna í MBF kemur at leiða okkum ígjøgnum kvøldið.

Tóra við Keldu, forkvinna í MBF, vitjaði morgunsendingina hjá Kringvarpinum mánamorgun 13. februar. Hoyr samrøðuna her:

http://kvf.fo/netvarp/uv/2017/02/13/mbf-umhugsar-finna-anna-or-fyri-brek

Vit síggjast!

Meginfelag teirra, ið bera brek